karaokemasr: ديسمبر 2017

الغيره مش حب!
السيطره مش حب!
الدكتاتوريه مش حب !
التملك مش حب!
الرغي ٢٤ ساعه مش حب!
اننا نبقي واحد ملتصقين في كل حاجه في مشاعرنا و افكارنا و خروجاتنا مش حب!

امال ده اه ؟!
ده اسمه حب مشوه أو حب بايظ او حب مرضي

انت مشوفتش تيمور و شفيقه !
- شوفته ده حب مريضي مشوه بايظ

مسمعتش اصاله و هي بتقول
"ليه بنادى الناس باسمك وأبقى خايفة إنى أخاصمك
حاسة إنى بقيت بقاسمك فى الهوا اللى بعيش عليه"

- سمعتها ده برده حب مرضي مشوه بايظ

انا اسف ان اقول ان أغلب الميديا بتشجع علي التشوه و المرض و البوظان ...

طب اقولكم حاجه كمان !
عارف لما بتبقي لسه متعرف علي حد وتلاقي نفسك عاوز تشوفه كل يوم و و تتكلم معاه طول النهار و تجبله الدنيا كلها و الكلام ده

ده برده مش حب!

- اومال !
ده اسمه انجذاب او يسمي بردو حاله أفتتان بالشخص الاخر

اومال اه الحب بقي علي كده ؟
الحب هو اختيار !

- نعم ؟؟؟
- ايوه اختيار ان تحب شخص عارف عنده مشاكل كذا و كذا و كذا ..... اختيار انك تسعد الحد التاني بانك تعمل حاجه مش عاوز تعملها ( بس طبعا تكون حاجه مش بتيجي عليك حاجه صح و كويسه يعني)
الحب مبني علي معرفه و ثقه و ايمان بالشخص التاني ، بيخليك كل يوم تجدد اختيارك حتي لو مشاعرك نقصت و ضعفت مع الوقت
الحب الحقيقي مفهوش حاجه اسمها مشاعري اتغيرت .. لانها مهما اتغيرت هاختار احبك و ترجع تاني عادي

الحب انك تسمع و انت مش قادر تسمع، تساعد و انت تعبان
تحتوي و انت ملكش نفس ... تفضل الاخر و انت بطبعك اناني و عايز نفسك الاول

الحب هو جو أمن ... مفيهوش خوف ... و لا تخوين ... و لا رفض و لا سيطره و لا تملك
حب أفعال اكتر ماهو كلام
الحب حريه و انطلاق و ابداع

الحب المبني علي انجذاب و مشاعر هو حب كداب ... هو فيلم مراهقه بايخ

الحب الحقيقي الي بجد مش هتلقيه في الأفلام الرومانسيه و لا الاغاني العاطفيه هتلقيه في غسيل المواعين و غسل الهدوم و مسح الارض ... هتلقيه في وقت الازمات الماليه و الفشل الكبير ....هتلقيه مع المرض و الضعف مع فقدان ناس قريبه ... هتلقيه لما المشاعر تخلص و الانجذاب ينتهي و تقرر برده تحب

الحب اختيار متجدد
بس الموجود في السوق دلوقتي أغلبه مشوه و بايظ و مريضي بيملئ فراغ و السلام